Statistikat tregojnë se adoleshentët e sëmurë me AIDS zënë vetëm rreth 1 përqind të të gjitha rasteve me këtë sëmundje. Kjo nuk duhet të çudisë? njeri. Duhen rreth 11 vjet nga infektimi me HIV deri në shfaqjen e sëmundjes AIDS. Në qoftë se numri i adoleshentëve me sëmundjen e AIDS plotësisht të zhvilluar është i vogël, numri i adoleshentëve të infektuar me HIV dhe që presin të sëmuren është shumë i madh.
Askush nuk e di me siguri se sa adoleshentë janë të infektuar me HIV në vendin tonë. Ky infeksion nuk ka shenja të dukshme për shumë vite dhe fare pak të rinj testohen për HIV. Mënyra më e mirë për të vlerësuar gjendjen është të shikohet numri i njerëzve që kanë AIDS e që janë midis moshës 20-29 vjeç. Po të kemi parasysh vitet që duhen nga infeksioni deri në shfaqjen e simptomave, atëherë kuptojmë se shumica e tyre ishin infektuar me HIV kur kanë qenë adoleshentë.
Në të gjithë botën, numri i personave me AIDS që janë infektuar me HIV kur kanë qenë adoleshentë është shumë i madh. Kjo tregon se ky virus është një rrezik real për shumë të rinj seksualisht aktivë edhe tek ne.
Gjithkush mund të infektohet me HIV, madje, edhe nga një incident i vetëm i rrezikshëm. Por, midis të rinjve, disa janë në rrezik më të madh se të tjerët për t’u infektuar nga HIV-i. Këta janë ata të rinj që angazhohen shpesh në sjellje të rrezikshme seksuale.