Nuk bëjmë dot fëmijë

penPyetje:
Jam e martuar që prej 5 vjetësh dhe nuk kam ende fëmijë. Kemi bërë kontrolle të njëpasnjëshme por pa sukses. Burri ka problem me numrin e ulët të spermatozoideve. Ka përdorur tableta Profertil por pa sukses. Jam shumë e dëshpëruar për këtë çështje. Ju lutem doktor më ndihmoni që edhe unë të bëhem nënë një ditë. Këtu në Kosovë nuk kemi mjek për meshkuj prandaj ju lutem më jepni një terapi adekuate për burrin per rritjen e numrit të spermatozoideve. Burri im nuk pi as alkol as duhan. Nëse të duhen analizat ti dërgoj. Nëse ka mundësi ju takojmë edhe juve. Shpresoj shumë të na ndihmoni.

Përgjigje:
Problemet në ngjizjen e fëmijëve (fertilitetit) ku përgjegjës janë burrat, janë të shpeshta. Ato thuhet se janë të barabarta me të grave. Nuk më thua çfarë moshe ke ti dhe burri yt, por pesë vjet, që tentoni të ngjizni një fëmijë dhe nuk e arrini do të thotë se keni pritur shumë. Një çift që kërkon të ketë fëmjë dhe nuk e arrin këtë brenda një viti duhet pa tjetër të shkojë tek doktori dhe ta zgjidhë problemin. Çdo muaj dhe vit që kalon, veçanërisht, po qe se jeni mbi 30-35 vjeç e rëndon situatën. Do të ishte shumë mirë po t’i dinim rezultatet e spermogramës së burrit tënd. Shkoni tek një doktor që merret me problemin e fertilitetit, zakonisht, ky mund të jetë nje obstetër/gjinekolog. Sot ka shumë mundësira për çiftet që nuk ngjizin fëmijë dhe mendoj se ato do t’u ndihmojnë të mos mbeteni pa fëmijë. Fertilizimi in Vitro mund të bëhet me vezën tënde dhe me përzgjedhjen e spermatozoidëve të burrit, kur ato janë të pamjaftueshme. Sido qoftë bisedoni me një person që merret me fertilizimin.
Për të më takuar, besoj, është e pamundur. Unë jetoj në Sh.B.A.
Të uroj shëndet, fat dhe një fëmijë që aq shumë e dëshiron.
Doktori