Pyetje:
Përshëndetje doktor.
Jam një vajzë 23 vjeç nga Tirana, kam dy pyetje:
1- A dëmtohet vagina nga kondomi? Kam 6 muaj që kam nisur të kryej marrëdhënie të rregullta me partnerin tim, në çdo akt kemi përdorur kondom, nuk kemi patur asnjë kontakt të organeve gjenitale. Por një mikes time i ka ndodhur një irritim i theksuar i vaginës dhe mjeku i ka thënë se e ka nga kondomi. Une aktualisht nuk kam asnjë problem, por kam frikë mos më ndodh diçka e tillë…
2- Sapo lexova artikullin për Kancerin e fytit dhe seksin oral. Une kam kryer seks oral rreth 4-5 herë pa kondom. Shpresoj mos kem pasojat që sapo lexova. Pra duhet të përdor kondom edhe në seksin oral, edhe pse ndodh rrallë?
Ju falenderoj për informacionet që n’a jepni, jam në pritje të përgjigjes nga ju. Gjithë të mirat.
Përgjigje:
Vagina mund të dëmtohet prej kondomit në këto raste:
Kur gruaja është alergjike ndaj lateksit, materialit me të cilin bëhen kondomet.
Kur vagina është e thatë dhe në këto kushte, pa pritur lubrifikimin e saj, kryhet akti seksual.
Kur përdoren kondome të palubrifikuara.
Kur gruaja ka ndonjë infeksion vaginal.
Shoqja jote mund të ketë ndonjërën nga këto arsye.
Përdorni lubrifikantë të bollshëm me bazë ujore, siç është K-Y, mos përdorni lubrifikantë si vazelina sepse ato e prishin kondomin.
Kush ka alergji nga latexi, duhet të përdorë kondome që përgatiten nga material tjetër ose kondome prej zorrës së qengjit.
Lidhur me pyetjen e dytë që lidhet me seksin oral dhe HPV duhet të keni parasysh këto:
Seksi oral duhet të bëhet i mbrojtur, pra me prezervativ, kur penisi merret në gojë dhe me dam dentar,(një copë plastike dentare)kur djali vendos gojën në vulvën e vajzës. Ky është rregull sin equa non (që duhet zbatuar pa tjeter)
Kanceri i fytit nga HPV mund të jetë i rallë por infeksioni vaginal dhe ai oral janë më të shpeshtë. HPV është shkaku i kancerit të qafës së mitrës.
Ka pak vjet që ka filluar të përdoret vaksina Gardasil kundër infektimit me HPV. Këtë vaksinë e bëjnë vajzat që nuk kanë filluar jetën seksuale, sepse po fillove jetën seksuale me seks jo te sigurtë, vajza me siguri është e infektuar dhe vaksina nuk ka asnjë efekt. Vaksinën duhet të bëjnë vajzat e pa infektuara me HPV, pra që nuk kanë filluar jetën seksuale.
Të uroj shëndet e fat dhe përdorni gjithmonë seksin e sigurtë.
Doktori.